Search

Mis lea ođđa buvttadeaddji!

Updated: Jan 7

Buorre ođđa jahki! Sámi musihkkafestiválas lea ođđa bargi!


Anni-Rauna Triumf lea virgáduvvon Sámi musihkkafestivála buvttadeaddjin, ja galgá ovttabargat buvttadeddjiin Elle Mari Dunfjell Oskaliin earret eará Sámi Beassášmárkaniid lágidemiin. Ovddeš festiválabuvttadeaddji Ol Johan Gaup galgá bargat Sámi Grand Prix buvttadeaddjin.

Govas: Anni-Rauna Triumf ja Elle Mari Dunfjell Oskal, Sámi musihkkafestivála. Anni-Rauna lea 30 jagi ja lea Guovdageainnus eret. Son lea oallugiidda oahpes jietna, go lea maŋemus áiggiid bargan GLR rádios, erenomážit rádiobingoin. Sus lea olu vásáhus eaktodáhtolaš bargguin ja servviin, ja dovdá danin Guovdageainnu servodaga ja olbmuid hui bures. - Mus lea álo leamaš beroštupmi ovddidit Guovdageainnu ja lágidit doaluid ja doaimmaid, ja mii vel buoret de go beassat leat mielde lágideame Sámi stuorámus festivála, dadjá Anni-Rauna Triumf. Ođđa jahki, ja sávvamis maiddái buoret jahki! - Mii leat plánegoahtán Sámi Beassámárkaniid 2022 doaluid. Lea olu bargu ja festivála ovdána jođanit, danne lea somá go leat čeahpes bargi ožžon fárrui! Árvideamis leat oallugat váillahan konsearttaid, deaivvadit olbmuiguin ja dovdat dan buori beassášdovddu, ja mii bargat dan ovdii ahte beassášdoalut šaddet nu buorit go vejolaš, dadjá Elle Mari Dunfjell Oskal.


Sámi Grand Prix 2022 lágiduvvo Báktehárjjis NRK ovttasbargguin ja čájehuvvo njuolggosáddagin NRK 1, NRK TV ja rádio bokte. Šaddá stuorát šovva go goassege ovdal. Ol Johan Gaup lea Sámi Grand Prix buvttadeaddji ja sus lea váldoovddasvástádus Sámi musihkkafestivála bealis.

Mii sávvát fargga fas oaidnalit Báktehárjjis ja Guovdageainnus movttegis gávttehasaiguin, juoigat jitnosit ja guldalit sámi buoremus artisttaid ja juigiid. Sámi Beassášmárkaniin lea maiddái ođđa festiválabáiki Gilišiljus stuoralávuin, ja árbevirolaš heargevuodjimat leat fas ruovttoluotta. Mii bargat dan guvlui ahte sáhttit lágidit dorvvolaš ja somás doaluid, ja sávvat bures boahtima Guovdageidnui beassážiid!


Dearvuođat

Sámi musihkkafestiválas Guovdageainnus

483 views0 comments