Háliidat go don lávlut dahje juoigat Sámi stuorámus lávddis? Sámi musihkkafestivála, ovttas NRK:in lea ohcame oasseváldiid Sámi Grand Prix 2025 gilvvuide!
Dieđihanáigemearri lea 25.11.2024!
Lea go niehku artistan šaddat, dahje livččii go somá addit luođi skeaŋkkan muhtin lagas olbmui ja juogadit dan vásáhusa olles Sámiin ja Davvi-riikaiguin? Dieđit, ja soaittát don okta dain lávlun dahje juigiin gii lávvordaga 12.04.2025 beasat Sámi stuorámus TV-buvttadeamis báitit!
Sámi Grand Prix 2025 lea rabas juoigan- ja musihkkagilvu, masa buohkat geat čállet/ráhkadit šuoŋaid ja luđiid sáhttet sáddet iežaset buktaga. Lávlla dahje luohti ii ábut leat almmuhuvvon dahje ovdanbuktojuvvon almmolaččat ovdal.
Luođit galget čuovvut sámi árbevirolaš juoiganmálle (vuelie, vuolle, luohti, livde, leu’dd) ja ovdanbuktojuvvot musihka haga. Lávlagat galget ovdanbuktojuvvot sámegillii (åarjel, upmeje, bihtán, julev, davvi, anáraš, nuortalaš, kildin, ter, akkil).
Oassalastit galget leahkit boarraset go 16 jagi.
Dieđihit lea álki!
Lávlla dahje luohti ii dárbbaš leat áibbas gárvvis, ja ii dárbbat studios báddejuvvon. Telefovdna maiddái dohkke!
Sáhtát dieđihit NRK siiddu bokte dákko,
Govven: Mads Suhr Pettersen Dahje dieđit min siiddus.
Sahtat maid e-boastta bokte dieđihit Sámi musihkkafestiválii: sgp@samieasterfestival.com Bija mielddusin lávlaga dahje luođi. Čáles vel gulahallandieđuid. Jus lávllateaksta lea gárvvis, de sáddes áinnas dan maid. Lea maiddái vejolaš gulahallat ja dieđihit telefovnna bokte: Ol Johan Gaup tlf: +47 977 34 966
(Govven: Mads Suhr Pettersen)
Jus válljejuvvot mielde, de gokčojuvvojit buot golut buvttadit ja báddet lávlaga/luođi jus ieš it leat gárvvisin dan jo dahkan. Oassálastingolut muđui maiddái gokčojuvvojit.
Orro go miellagiddevaš? Geahča Sámi Grand Prix 2024 sáddaga dás vai oainnát man erenomáš SGP lea!
Váldde oktavuođa:
Ol Johan Gaup, Sámi Grand Prix buvttadeaddji, Sámi musihkkafestivála +47 977 34 966/ producer@samieasterfestival.com
Comments