Search

SÁMI GRAND PRIX 2023 DIEĐIHEAPMI


Háliidat go don lávlut dahje juoigat Sámi stuorámus lávddis? Sámi musihkkafestivála, ovttas NRK:in lea ohcame oasseváldiid Sámi Grand Prix 2023 gilvvuide!


Dieđihanáigemearri lea 01.12.2022!

Lea go niehku artistan šaddat, dahje livččii go somá addit luođi skeaŋkkan muhtin lagas olbmui ja juogadit dan vásáhusa olles Sámiin ja Davvi-riikaiguin? Dieđit, ja soaittát don okta dain lávlun dahje juigiin gii beassášlávvordaga 08.04.2023 beasat Sámi stuorámus TV-buvttadeamis báitit!


Sámi Grand Prix 2023 lea rabas juoigan- ja musihkkagilvu, masa buohkat geat čállet/ráhkadit šuoŋaid ja luđiid sáhttet sáddet iežaset buktaga. Lávlla dahje luohti ii ábut leat almmuhuvvon dahje ovdanbuktojuvvon almmolaččat ovdal.


Luođit galget čuovvut sámi árbevirolaš juoiganmálle (vuelie, vuolle, luohti, livde, leu’dd) ja ovdanbuktojuvvot musihka haga. Lávlagat galget ovdanbuktojuvvot sámegillii (åarjel, upmeje, bihtán, julev, davvi, anáraš, nuortalaš, kildin, ter, akkil).

Oassalastit galget leahkit boarraset go 16 jagi.


Vuoittut

Juoiganoasi ja lávlunoasi vuoiti oažžu goabbáge NOK 20 000,

NOK 50 000-árvosaš stipeandda ja fálaldaga doallat konseartta Sámi beassášmárkaniin čuovvovaš jagi.

Nubbi sadji oažžu NOK 10 000 ja goalmmát fas NOK 5 000.


Dieđihit lea álki!


Lávlla dahje luohti ii dárbbaš leat áibbas gárvvis, ja ii dárbbat studios báddejuvvon. Telefovdna maiddái dohkke!

Sáhtát dieđihit NRK siiddu bokte dákko,

Deavdde skovi mii lea áibbas vuolemusas NRK artihkkalis. SOÁ SGP 2022 lávlunoasis (Govven: Mads Suhr Pettersen) Dahje sáddes e-boastta Sámi musihkkafestiválii: sgp@samieasterfestival.com Bija mielddusin lea lávlla dahje luohti. Čáles vel gulahallandieđuid. Jus lávllateaksta lea gárvvis, de sáddes áinnas dan maid. Lea maiddái vejolaš gulahallat ja dieđihit telefovnna bokte: Ol Johan Gaup tlf: +47 977 34 966

Jus leat lávllačálli dahje buvttadeaddji, de sáhtát maiddái dieđihit! Dieđit de áinnas gean háliidivččet galgá ovdanbuktit du lávlaga, vai mii sáhttit veahkehit du gávdnat rievttes artistta.

Máhtte Ánte J. Sara lei mielde Sámi Grand Prix 2022 juoiganoasis (Govven: Mads Suhr Pettersen)


Sámi Grand Prix 2023 lágiduvvo beassášlávvordaga cuoŋománu 8. beaivvi Báktehárjjis Guovdageainnus. SGP 2023 sáddejuvvo njuolggosáddagis earret eará NRK1 bokte.


Jus válljejuvvot mielde, de gokčojuvvojit buot golut buvttadit ja báddet lávlaga/luođi jus ieš it leat gárvvisin dan jo dahkan. Oassálastingolut muđui maiddái gokčojuvvojit.


Orro go miellagiddevaš? Geahča Sámi Grand Prix 2022 sáddaga dás vai oainnát man erenomáš SGP lea!


Váldde oktavuođa:

Ol Johan Gaup, Sámi Grand Prix buvttadeaddji, Sámi musihkkafestivála +47 977 34 966/ producer@samieasterfestival.com

42 views0 comments

Recent Posts

See All