SÁMI GRAND PRIX 2021
Sámi Grand Prix juoiganoasi vuoiti lea Máhtte Ánte J. Sara
Karen Marianne luđiin. Lávlunoasi vuoitit leaba Hildá Länsman ja Lávre lávlagiin Jođi. Olu lihkku didjiide!
Sámi Grand Prix 2021 lágiduvvui dán jagi studio bokte ja čájehuvvui sihke NRK2-kanálas ja neahttastreama bokte NRK Sápmi neahttasiidduin.
Vuollelis sáhtát oaidnit geat dán jagi oassálastit ledje.
LÁVLUNOASSI
Dát ledje mielde Sámi Grand Prix 2021 lávlunoasis
YARSEM GALKIN & ROMAN YAKOVLEV - MOAJNAS 'SEEJJTJAA'VR BAJAS
Yarsem lea čállán rapteavstta ja Roman lea musihka dahkan dán máidnasii gielddasámegillii - Моайнас Се̄ййтъя̄вьр баяс
EIRA - MÁILMMI NIEIDA
Eira oappážagat bođiiga nubbin Sámi Grand Prix 2019. Anne Inger E. Lilleng lea čállán lávlaga, ja ovttas Marit Elisabeth Eira ja Bongg' Ánttiin leat sii ráhkadan šuoŋa.
INGÁ MÁIIÁ BLIND - FÁRRUI
Ingá Máiiá lea dán jagi nuoramus oasseváldi. Son searvá lávlagiin maid Niels Ovllá Oskal Dunfjell ja Berit Margrethe Oskal leaba čállán.
AILU VALLE & INGÁ MÁRJA SARRE - BEASSÁŠLIHKKU
Ailu Valle ja Ingá Márjá sarre searvaba hip-hop šuoŋain beassášlihkku. Nuohta ja šuoŋa leaba ieža čállán.
BERNT MIKKEL HAGLUND - STOAGADIT DOLAIN
Bernt Mikkel Haglund searvá iežas čállojuvvon lávlagiin Stoagadit dolain. Ville Söderbaum čuojaha saksofovnna.
HILDÁ LÄNSMAN & LÁVRE - JOĐI
Hildá Länsman já Lávre Johan Eira leaba fárrolaga čállán lávlaga mainna searvaba.
JUOIGANOASSI
Dát ledje mielde Sámi Grand Prix 2021 juoiganoasis
JOHAN ANDERS OSKAL -
PER THOMAS
Johan Ánte lea eret Bearddus ja lea bidján luođi iežas vilbeallái Per Thomas Oskalii.
ELEN RÁVNA A. TRIUMF - LENA
Guovdageaidnolaš Elen Ravna lea bidján luođi iežas nuoramus niidii Maikela Lenai
MÁHTTE ÁNTE J. SARA -
KAREN MARIANNE
Máhtte Ánte lea Guovdageainnus eret. Son lea bidján luođi iežas eamidii Karen Marianne Gaup-Sara.
JÖRGEN STENBERG - MATHIAS
Jörgen Stenberg lea Málágis (Malå) eret ja lea bidján vuelie (luođi) Mathias Larssonii
NILS PEDER A. GAUP -
SARA RISTEN SUSANNA
Iŋgor Ántte Nils Peder dahje Iŋgor Nila Guovdageainnus eret lea bidján luođi nieidasis Sara Risten Susanna Gaup.
HANNA-MAARIA KIPRIANOFF -
MANNU MAAINÂS
Hanna-Maaria boahtá Čeʹvetjäuʹrr gilis ja leu'dd son lea bidján lea olbmo birra gii gullá sánehis máidnasit go vánddarda mánu ja násttid searvvis. Dát lea giela massima ja máhcaheami birra ja eallima losit geainnuid vázzit.
NILS LARS EIRA -
JON ANDREAS ROGNERUD EIRA
Nils Lars Eira lea Kárašjogas eret ja lea bidján luođi vilbeallái ja olbmái Jon Andreasii
DOMNA KHOMJUK -
PARRŠA VIGKET
Dovddus luvvt (luođi) árbeguoddi Domna Khomjuk lea Goardegk-gilis (Voronje) eret Murmanskaja guovllus. Dán luvvt lea son dahkan dajahusaid gielddasámegillii mii leage su eatnigiella.
NILS JOHAN A. GAUP -
NILLAS ELLE SARA
Egan Ántte Nils Johan lea Guovdageainnus eret ja lea bidján luođi iežas oambeallái Niillas Elle Sara / Elle Sara Bals
KIM HALLGEIR BERG -
ANNA MATHILDE
Sámi Grand Prix 2019 vuoiti Kim Hallgeir Berg Kárašjogas eret lea bidján luođi iežas ristniidi Anna Mathilde Nilsdatter Lango
SÁMI GRAND PRIX
Sámi Grand Prix lea sámi stuorámus musihkkadáhpahus gos beassat gullat áibbas ođđa čállojuvvon sámi lávlagiid ja ođđa luđiid. Beassat maid gullát eara lávlagiid ja luđiid ja Áillohaš musihkkabálkkašupmi juhkkojuvvo. Áiggiid čađa leat muhtin min stuorámus artisttáin ja juigiin oasalastan ja mii leat beassan gullát olu sámi musihkkahistorjja klássihkkáriid dán lávddis.
Sámi Grand Prix sáhttá dieđihit ođđa čállojuvvon lávlaga mii lea ovtta min sámegielaide, dahje ođđa dahkkojuvvon luođi mii čuovvu muhtin min luohteárbevieruin. Lávlla dahje luohti ii galgga almmuhuvvon ovdal. Mielde besset 6 lávlaga ja 10 luođi ja dáid gaskkas de jienastuvvot vuoitit. Dat geat vuitet ožžot NOK 20 000 ja fálaldaga doallat konseartta čuovvovaš jagi mas lea árvu NOK 50 000. Lávlunoasi vuoiti maiddái beassa oasalastit Liet International gilvvuin mii lea lávlungilvu Eurohpa unnidloguidgielaide. Dat geat nubbin boahtet ožžot NOK 10 000 ja goalmmádin fas NOK 5 000. Golbma buoremusa ožžot maid fálaldaga doallat konseartta Riksscenenis.
Dás sáhtát gullat buot Sámi Grand Prix lávlagiid mat leat almmuhuvvon.
Dás sáhtát gullat buot Sámi Grand Prix luđiid mat leat almmuhuvvon.
