Áilloš & Nordic Voice birra
Rabasvuođain leat Nordic Voices ja Iŋgor Ántte Áilu Gaup (Áilloš) lahkonan nubbi nuppi univearsa. Nordic Voices lea ožžon guokte luođi oktan teavsttain maid Áilloš lea komponeren, ja leat áŋgirit bovdejuvvon su máilbmái. Ovttas Lasse Thoreseniin leat sii deaivvadan máilmmis gos ođđa lávlunteknihkat, ođđa šuoŋat ja gos leat addán sihke luohtái ja klassihkalaš árbevirrui ođđa ivnniid ja ođđa hámi. Nordic Voices lea ovdal bargan ovttas Norgga ja eará riikkaid álbmotmusihkkáriiguin, ja lea dainna bargguin ásahan áibbas ođđa lávlunvugiid. Ovttas Áilložiin ja Lasse Thoreseniin leat mii beassan oahpásmuvvat áibbas ođđa streaŋggaide, ja dáinna ovttasbargguin lea ráhkaduvvon áibbas ođđa jietnaunivearsa. Dán universa ovdanbuktit olbmuide Sámi beassášmárkaniid 2024 rahpamis Guovdageainnus.
