Ailu Valle, Amoc & Boogiemen birra
Ailu Valle ja AMOC lávkeba Báktehárjji lávddi nala beassášlávvordaga ovttas bandain Trio Boogiemen, ja sii lohpidit garra showa, mas rap- ja heavyrock -máilmmit deaivvadit. Mii beassat gullat bihtáid AMOC ja Ailu Valle sutno boahttevaš oktasaš skearrus ja maiddái beakkán jiellatšuoŋaid. Boogiemen čuojaheaddjit leat Oula Guttorm (gitára), Juho Kiviniemi (bássa) ja Patrik Fält (rumbbut).
Ailu Valle lea dovddus su čiekŋalis davvisámegielat rapteavsttaiguin ja su erenomáš musihkalaš ovdanbuktimiin. Ailu Valle lea almmuhan golbma soloskearru ja leamaš mielde máŋgga prošeavttain iešguđet šáŋŋeriin. Jagis 2020 oaččui son buoremus lávllačálli bálkkašumi Sámi Music Awardsis ja jagis 2019 Suoma stáhtabálkkašumi.
AMOC lea vuosttaš anárašgielat rapartista ja lea guoimmuhan garra rapmusihkain badjel 20 jagi. Son govvida iežas šáŋŋera horrorrappan, ja lea beaggán riikkarájiid rastá musihkainis, mii lea ožžon inspirašuvnna ee. sámi mytologiijas ja ilgadis sivdnádusain. AMOC almmuhii vuosttas skearru Amoc-kaččâm jagis 2007 ja válljejuvvui seamma jagi Jagi nuorra Eurohpálažžan.