ELLE MAIJA

Elle Maija Klefstad Bær atná luođi vuođđun go guoimmuha blues, pop ja rock šuoŋaiguin ja nu ovdanbuktá máŋga musihkkaárbevieru. Son lea gitáračuojaheaddji ja lávlu guhte lea beaggán sámi musihkkamáilmmis nuorravuođa rájes. Eanemusat lea beaggán sologitáračuojaheaddjin Rolffa-joavkkus, muhto Elle Máijá lea maiddái bargan Mari Boiniin, čuojahan eventjoavkkus Soulpatch ja leamaš mielde Dolvot nammasaš sámi lávllačállincampas máŋga jagi. Maŋemus jagiid lea bargan vuosttaš soloprošeavttainis mas sihke juoigá ja lávlu davvisámegillii ja dárogillii. 2023 čavčča lei son mielde «Stjernekampas», NRK guoimmuhanprográmma gos artistat gilvalit šaddat Norgga buoremus guoimmuheaddjin.