ISÁK boahtá Guovdageidnui čuojahit! Sin seaguhus luođis ja ođđaáigásaš urbána šuoŋas lea šaddan bivnnut vel olggobealde Sámi maid! Trios leat vokalista Ella Marie Hætta Isaksen, buvttadeaddji Daniel Eriksen ja rumbočuojaheaddji Aleksander Kostopoulos. Ella Marie vuittii Sámi Grand Prix 2016 ja lea iežas joavkkuin olahan olu ja viidát. Mii illudit fas vásihit sin LIVE šovva Báktehárjjis!
DJ iDJa, dahje Markus Thonhaugen, čuojaha Báktehárjjis konsearttaid gaskka, ja lohpida mixaid sámi hitsain maidda beassat juoigat nu ahte dáhkki loktana! Árbevirolaš sámi musihkka, seaguhuvvon house, technoin ja discoin lea su musihka vuođđu, ja mihttu lea álo čájehit luođi ođđa guldaleddjiide - dánsunláhttis!
Govven: Mads Suhr Pettersen